Учениците и професорите во СОУ „Никола Карев“ денеска го одбележаа својот патрон

Средното општинско училиште „Никола Карев“ од Струмица денеска го чествувa својот патрон, 118 години од загинувањето на македонскиот револуционер Никола Карев.

По тој повод пред спомен бистата на Карев во училишниот двор се одржа пригодна свеченост на која говореше директорот Зоран Петков, а ученици од ова училиште интерпретираа рецитал за великанот Никола Карев.

Ученици од Драмското студио на училиштето под менторство на професорите Ице Биличев и Елисавета Маџункова Фончева ја изведоа претставата „Последниот лет за Европа“, а членови на музичката секција настапија со свои музички изведби.

На денешен ден 27 април 1905 кај село Рајчани, кочанско, загинува Никола Карев, горскиот началник и водач на Илинденското востание, или како што го нарекува народот, претседателот на Крушевската Република. Роден е на 23 ноември 1877 година во Крушево, како четврто дете во сиромашното семејство Кареви.