Ученикот Лука Стојановиќ од Колешино го освои првото место на конкурсот за избор на најдобар есеј на Министерството за образование и наука

Министерството за образование и наука ги објави резултатите од конкурсот за избор на најдобар есеј, кој беше наменет за ученици по повод 80 години од усвојувањето на македонскиот јазик како службен јазик.

На конкурсот право на учество имаа сите ученици од четврто до деветто одделение од основните училишта и од прва до четврта година од средните училишта. Во зависност од возраста и наставниот јазик, беа дадени четири теми, а пристигнаа вкупно 323 апликации.

Во категоријата на ученици од четврто до шесто одделение, кои се натпреваруваа на тема „Мојот македонски јазик е како виножито, полн со бои и зборови“, првото место го освои ученикот Лука Стојановиќ од ООУ „Видое Подгорец“ од село Колешино, општина Ново Село, под менторство на наставичката Атина Манчева.

Во категоријата на ученици од седмо до деветто одделение кои пишуваа на тема „Мојот македонски јазик – мој идентитет, културно наследство и аманет“, првото место го освои есејот на ученичката Ива Јосифовска од ООУ „Гоце Делчев“ од Прилеп, додека на истата тема, помеѓу учениците од прва до четврта година средно образование, првонаграденa е ученичката Тијана Атанасова од СОУ „Јосиф Јосифовски“ од Гевгелија.

„Јазикот е душата, идентитетот и светогледот на еден народ. Не е само средство за комуникација, туку е и симбол на индивидуалноста и уникатноста. Да го почитуваме и да продолжиме да се грижиме за развојот на македонскиот, но и на сите други јазици на кои говорат граѓаните на Македонија“ – соопштија од МОН.