Утрово во „Св. Петнаесет“ се одржа Света Божествена литургија во чест на Светите Петнаесет Тивериополски свештеномаченици

Денеска Струмица ги празнува заштитниците на градот, Светите Петнаесет Тивериополски свештеномаченици.

По повод празникот, утринава во Манастирот „Св. Петнаесет Тивериополски свештеномаченици“ во Струмица беше отслужена Света Божествена Литургија со која началствуваше Митрополитот на Дидимотихо, Орестиада и Суфли г. Дамаскин од Православната Црква на Грција, во сослужение на Митрополитот Захумско-херцеговачки г. Димитриј од СПЦ, Митрополитот Европски г. Пимен и надлежниот Митрополит Струмички г. Наум со викарниот Епископ Стобиски г. Јаков.

После задамвоновата молитва, Митрополитот Европски г. Пимен го благослови празничното коливо и празничниот леб на годинешните кумови, фамилијата на градоначалникот Костадин Костадинов.

Викарниот Епископ Стобиски г. Јаков порача секогаш да се држиме до Светите Петнаесет Тивериополски Свештеномаченици затоа што тие се наши заштитници пред Бог.

Старешината на овој манастир, отец Даниел Ѓоргиев во изјава за медиумите го истакна личниот однос кои го имаат струмичани и цела Македонија кон Светите Петнаесет Тивериополски свештеномаченици и од какво значење се тие за Струмица и Македонија.

На Светата Божествена литургија покрај многуте верници, градоначалникот на Струмица, членови на Советот на општината, присуствуваа и градоначалникот на Кукуш во Грција, Димитриос Киријакидис, пратеникот во македонското Собрание, Миле Цеков, почесниот конзул на Србија во Македонија, Михајло Филев, директорката на Комисијата за односи со верските заедници и религиозни групи, Оливера Трајковска.

За верата во Христа и за нивната исцелителска моќ во Струмица и струмичко и денес се раскажуваат легенди. Струмица е горда и со достоинство го почитува и негува култот на Светите Петнаесет Тивериополски свештеномаченици.

ФОТОГАЛЕРИЈА