Утре напладне на плоштадот „Гоце Делчев“ во Струмица ќе се одржи свеченост на која ќе се промовира воведувањето на јавен градски превоз на територијата на општина Струмица преку новоформираното Јавно сообраќајно претпријатие „Транспорт Струмица“.
Минатата недела во Струмица пристигнаа 10-те електрични автобуси, а утре по свеченоста присустните гости и граѓаните ќе можат „пробно“ да се повозат низ градот.
Како што ни кажа директорот на ЈСП „Транспорт Струмица“, Драги Поп-Стојанов во пробниот тест период од месец дена, односно до втората половина на октомври, автобусите ќе сообраќаат низ градот и населените места, но без утврдени редовни линии, бидејќи во овој период ќе се работи на обележување на хоризонтална и вертикална сигнализација, утврдување и поставување на места, односно постројќи, утврдување на линиите и времето на застанување на одредена постројка и други технички активности кои се неопходни за нормално функционирање на првиот јавен градски превоз во општина Струмица. Во тој период граѓаните можат слободно, бесплатно да се возат во автобусите.
Кон крајот на октомври, по завршувањето на сите активности и воспоставувањето на редовни линии во две смени, граѓаните ќе можат преку скенирање на QR-код на својот мобилен телефон да ги видат линиите, местата (постројките) каде ќе застануваат автобусите, во кое време, како и да го следат нивното движење.
Според најавите по овој пробен тест период возењето во еден правец ќе чини 30 денари – прва зона која го опфаќа градот Струмица и 60 денари – втора зона која ги опфаќа населените места во општина Струмица. Ќе има и месечна карта, а планирано е и денови за бесплатно возење за постарите граѓани, односно пензионерите.
