Струмичките актери ја најавија премиерата на претставата „Црна дупка“, а по повод големиот јубилеј – 75 години постоење на Струмичкиот театар

Денеска во Центарот за култура „Антон Панов“ во Струмица се одржа прес конференција на која беше најавена најновата претстава на Струмичкиот театар, премиера на претставата „Црна дупка“, која ќе биде изведена утре (петок, 19 април) во 20:00 часот, а со која ќе се одбележи големиот јубилеј – 75 години постоење на Струмичкиот театар.

На прес-конференцијата беше споделено задоволството што во годината на јубилејот се работи текст од Горан Стефановски и што проектот го работи долгогодишниот соработник на Струмичкиот театар, режисерот Љупчо Ѓоргиевски. Работата врз овој текст, како што беше речено во искажувањата, беше напорно, но и убаво искуство.

„Црна дупка“ е претстава за сите нас оти во секој од нас по малку живее еден Силјан, како што се вика главниот лик во претставата, и кој е на некој начин современа верзија на Силјан Штркот од позната прикаска на Марко Цепенков“, кажаа актерите.

Освен премиерната изведба на претставата „Црна дупка“, претходно во 19:30 часот во фоајето на Центарот за култура ќе биде поставена изложба на фотографии од Сречко Гунчев – „75 години Струмички театар“.