Струмичкиот карневал ќе се одржи од 13 до 20 март – главната карневалска вечер на 16 март

Струмичкиот карневал годинава ќе се одржи од 13 до 20 март, главната интернационална вечер е на 16 март (сабота) на која ќе учествуваат околу илјада маскирани лица од земјава и странство.

Карневалската недела започнува со предавањето на клучот на градот од страна на градоначалникот на Струмица на карневалистите на 13 март во 18:30 часот, а веднаш потоа ќе биде отворена Изложба на карневалски маски на СОУ „Јане Сандански“ Струмица.

На 14 март ќе се одржи „Концертот под маски“ на Музичкото училиште „Боро Џони“ од Струмица, еден во 18:00 часот и другиот во 20:00 часот, а меѓу двата концерти е предвидено отворање на Изложба во Градската Уметничка галерија – „30 години во FECC“. Истиот ден во 12:00 часот ќе се објават и резулатите од темата за проза и поезија за карневалот во организација на Библиотеката „Благој Јанков Мучето“.

Во петок, на 15 март, во хотелот „Сириус“ ќе одржи традиционалниот Маскенбал на кој се избираат принц и принцеза на Карневалот, кои заедно со кралската свита ќе ја предводат Интернационалната карневалска поворка на главната карневалска вечер на 16 март со почеток во 18:30 часот. Детскиот карневал се одржува традиционално на празникот Прочка, во недела на 17 март, од 11:00 часот низ струмичкото корзо и плоштадот „Гоце Делчев“.

На Чист Понеделник (18 март) карневалските празнувања продолжуваат во 13:00 часот на струмичкиот плоштад  со делење на традицоналниот бел грав, (фасуљ), а претходно во 12:00 часот ќе бидат објавени и резултатите од изборот на најуспешните маски од интернационалната карневалска вечер. Истиот ден вечерта во 19:30 часот во Центарот за култура „Антон Панов“ во Струмица ќе биде отворена и традиционалната изложба на карикатури и афоризми и ќе бидат доделени наградите на избраните најдобри дела.

Во вторник од 18:00 часот е традиционалното Карневалско корзо, а во 19:00 часот во Центарот за култура ќе бидат доделени наградите на најуспешните маски од саботната карневалска вечер.

Карневалските празнувања во Струмица завршуваат на сам ден Тримери, среда, 20 март, кога во 12:00 часот ќе се организира тримерски ручек и настап на музичкиот состав „Распеани струмичани“, по што карневалистите ќе му го вратат клучот од градот на градоначалникот Костадин Костадинов.