![almak](https://strumicanet.com/wp-content/uploads/2024/11/srnet-banner-noe-2-optimized.png")
Меѓу многуте манифестации по која се препознава Струмица низ светот е и најстарата и најпозната на Балканот и поширокиот регион ликовна колонија, која се одржува секоја година во месец август во градот Струмица – Меѓународната Струмичка ликовна колонија која годинава слави голем јубилеј, 60 години постоење, а во далечната 1963 година ја создале Кочо Урдин и Љупчо Апостолов.
Но со неа и уште еден јубилеј – 30 години од основањето на Студиото за современ мозаик која во рамките на Струмичката ликовна колонија ја основа академик Газанфер Бајрам. Единствено место во Македонија каде се негува оваа најстара сликарска техника и дициплина – мозаикот, е токму на ликовната колонија во Струмица.
Од денеска па во наредните десет дена, дваесеттина уметници од Романија, Турција, Србија, Црна Гора, Бугарија и Македонија ќе создаваат нови дела, ќе го збогатат фондот од 2800 уметнички дела создадени од 1600 уметници во изминатите 59 години.
Во името на Општина Струмица, синоќа Струмичката ликовна колонија ја прогласи за отворена Александар Ненчев, член на Советот на општина Струмица, потенцирајќи дека овој јубилеј му припаѓа на секој оној кој оставил свој печат на колонијата во изминатите шест децении и на оние организатори, учесници и пријатели на колонијата од времето кога таа се одржуваше во Работничкиот Универзитет во Струмица, но и на сите кои се современици на колонијата во годините што следуваат.
Со изложба на дела создадени во изминатите 59 години беше означен почетокот на годинашното јубилејно издание на Меѓународната Струмичка ликовна колонија, а новите дела кои ќе бидат создадени до 15 август, традиционално ќе бидат претставени на изложба на 11-ти септември, денот на ослободувањето на градот Струмица.
Иако голем јубилеј, отворањето на годинашното 60-то издание на Струмичката ликовна колонија помина скромно со многу малку љубители на ликовната уметност. Освен претставникот на општината, три-четири уметници, дел од вработени во Центарот за култура и случајни минувачи кои ги затекна дождот, па влегоа и беа дел од отворањето, големиот јубилеј и не беше така голем. Но тука се гостите уметници кои ќе создадат големи дела и ќе и ги остават како трајно богатство на Струмица и оваа реномирана Струмичка ликовна колонија.
