![almak](https://strumicanet.com/wp-content/uploads/2025/07/1080x206-srnet-optimized.png")
Годинашниот Струмички карневал почнува во среда со симболично предавање на „клучот од градот“ од страна на градоначалникот Костадин Костадинов на карневалистите што ќе го организираат осумдневното карневалско дружење. Карневалската програма е иста, како и изминатите години, ново годинава е тоа што водителот ќе биде нов, но познат македонски шоумен, Игор Џамбазов. Досегашниот водител Ѓорги Калајџиев по долги години се откажа поради „староста“.
На прес конференцијата пред стартот на годинашното издание на струмичкиот карневал, денеска во Младинскиот центар говореа градоначалникот Костадин Костадинов, претседателот на Организациониот одбор, Александар Цицимов во придружба на новиот водител Игор Џамбазов.
Градоначалникот Костадинов го изрази задоволството од успешното негување на вековната традиција на празнување под маски во Струмица, истакнувајќи дека Струмичкиот карневал е еден од најзначајните културни настани во државата.
Претседателот на ОО на Струмичкиот карневал, Александар Цицимов кажа дека во интернационалното карневалско дефиле ќе се претстават 47 групни и поединечни маски од кои 20 се гости од Хрватска, Босна и Херцеговина, Црна Гора, Србија, Грција, Бугарија и Турција, а ќе учествуваат и групи од македонските градови Куманово, Пробиштип и Кавадарци. Имајќи во предвид дека во рамките на карневалските свечености ќе биде одбележан и јубилејот – 30 години од приемот на Струмица во Федерацијата на Европските карневалски градови – FECC, годинава на Струмичкиот карневал ќе има голем број гости од FECC од повеќе европски земји.
