Струмичката гимназија ги има најдобрите вокални солисти – четири девојки освоија прва награда на „Вива ла музика“ во Прилеп

Дека во СОУ „Јане Сандански“ од Струмица ги има најдобрите вокални солисти и најдобриот средношколски хор во Македонија се потврди и годинава. Вчера во НУ Центар за култура „Марко Цепенков“ во Прилеп на Државниот натпревар за пеење за средни училишта „Вива ла музика“ ученичките Мартина Митева, Софија Весева, Анастасија Цамбулева и Анастасија Соколова, под менторство на професорката Анита Станковска се закитија со прва награда. Во своите изведби на песните „Моја последња и прва љубав“, „Girl on fire“, „Stay“ и „Don’t speak“ ги придружуваше со својот вокал нивната сооученичка Стефанија Ичовска.

Здружението на музички педагози на Македонија деновиве организираше регионални натпревари за основни и средни училишта во повеќе категории: соло пеачи, хорови, оркестри и бендови. Натпреварите беа реализирани со праќање на видео снимка од училница. Од СОУ „Јане Сандански” беа испратени седум видео снимки за соло изведувачи и по две видеа од хорот и бендот. Соло изведувачите освоија 4 први награди, две втори и една трета награда. Хорот под менторство на професорката Анита Станковска освои прва награда и бендот под менторство на професорот Денис Кирчанов освои втора награда. Првонаградените се здобија со право за учество на државното натпреварување.

Хорот на СОУ „Јане Сандански“ се подготвува и за државниот натпревар за хорови од средните училишта во Македонија, кој ќе се одржи на 14 мај во Валандаво на големата сцена во Домот на културата „25-ти Мај”.