Струмичанката Љупка Вртева „Жена инженер за 2023-та“ во Словенија

Струмичани може да се гордеат со уште една своја сограѓанка во странство. Синоќа во Љубљана, Словенија Љупка Вртева е избрана за „Жена инженер за 2023-та“. Таа уште во ноември се најде на листата на 10-те најдобри жени инженерки, а на синоќешната манифестација „Inženirke in inženirji bomo“ меѓу своите колешки од различни области беше прогласена за инженерка на годината.

М-р Љупка Вртева, која по завршувањето на средното образование во Струмица, во 2011 година ги започна студиите на Машинскиот факултет при Универзитетот во Љубљана, денес е вработена како развоен инженер во областа на греење, вентилација и ладење на објекти и проектен менаџер на соларна централа во компанијата „Петрол“ во Љубљана.

Љупка е горда е на својот успех и нејзината храброст да стане инженер, а својата приказна сака да ја пренесе на сите млади девојки и да ги охрабри да ги следат своите соништа.

„Ова не е само еден настан, ова е моја животна приказна. Од полагање на поправен испит по предметот физика во средното училиште во едно нездраво општество, до првите 10 инженерки во Словенија, кои претставуваат потенцијал, пример и инспирација за младите девојки и оттука да покажат како се оди по патот кон успехот со својот труд, единственост, доследност и особеност. Благодарна сум на Словенија што го препозна мојот потенцијал и ме поддржа од самиот почеток, благодарна сум што го почитува она што го работам и знае како да ме награди. Девојки, бидете храбри и следете ги вашите соништа“, кажа во своето видео претставување на 10-те номинирани жени инженерки.

Инаку, со изборот за инженер на годината, секоја година на јавноста и се претставуваат 10-те интересни жени инженери. Луѓе кои со својата личност и работа можат да ги охрабрат, инспирираат или поттикнат младите луѓе да одлучат за инженерско студирање или кариера. Од 10 номинирани, еден ја добива наградата инженер на годината секоја година. Фокусот на изборот за инженер на годината не се инженерските достигнувања на поединецот, туку разликата или нејзиниот потенцијал да биде пример и инспирација за помладите генерации девојки како инженери.

Изборот кој се одржува од 2012 година, е на иницијатива на „Simens“ Словенија, а е во коорганизација на „Revija IRT 3000“ и компанијата „Mediade“.