Струмичанката Кристина Зимбакова учествуваше на ликовна изложба во Дубаи под покровителство на УНЕСКО, насловена „Уметноста ги поврзува жените”, а на тема „Остави наследство”.
Осмото издание на оваа амбициозна светска изложба организирана од Галеријата „Зи-артс“ се одржа од 8 до 12 април во Меѓународниот финансиски центар Дубаи, во Обединетите Арапски Емирати, со дела од 112 жени – уметници од исто толкав број земји во светот. Секоја од учесничките како „уметнички амбасадор“ на својата земја беше одбрана во конкуренција од 500 индивидуални пријави од сите континенти.
Зимбакова се претстави со инсталацијата „Самовилата и волкот“, создадена во 2023 година, што се состои од кожен куфер и слики со мозаик од габи, акрил и пастел на хартија од габи рачно изработена од авторката.
Програмата на изложбата опфаќаше и еднодневна конференција со еминентни говорници, со акцент на улогата на жената во креативната економија, финансиската писменост во сферата на уметноста и одржливото влијание на уметноста врз општествените промени. Последниот ден од настанот беше заокружен со гала-вечер, на која секоја од уметничките беше поединечно претставена и наградена.
