Торта полна со чушки, френки, праз, кромид, боранија, грашок, феферонки, компир, патлиџан, фасуљ, тиква, габи, кикирики беше избрана за најубава на годинашната „Тортијада“, што се одржа синоќа во „Вила Парк“ во Струмица, а во организација на Здружението на лица со телесен инвалидитет „Мобилност“ од Струмица.
Осум торти подготвени од домаќинки членови на здруженијата „Мобилност“ од Скопје, Тетово, Прилеп, Кочани, Штип, Радовиш, Гевгелија и домаќините Струмица учествуваа на оваа манифестација која по 24-ти пат се одржува во Струмица.
Второто место жири комисијата во состав Николина Георгиева и Илинка Тодорова ја доделија на тортата што ја подготвија членови на „Мобилност“ од Прилеп, а трето место за тортата на „Мобилност“ од Гевгелија.
Заменичката на градоначалникот Елена Магеровска Паликарова, отворајќи ја манифестацијата кажа дека иако „Тортијадата“ има натпреварувачки карактер, многу поважно од се е негувањето на традицијата, дружењето и продлабочувањето на пријателствата.
„А што се однесува до наградите, верувајте ми на зборот, сите сте победници, а апсолутен победник е самата манифестација, 24-та „Тортијада 2023“, која успешно опстојува безмалку четвртина век, а ќе опстојува уште многу, многу години. Честитајќи им уште еднаш на организаторите и посакувајќи им успех на натпреварувачите, ве уверувам дека, како и до сега, така и во иднина, поддршката од градоначалникот и Општина Струмица никогаш нема да изостане“ – кажа Магеровска Паликарова.
На манифестацијата „Тортијада 2023“ освен што беа презентирани торти направени од лица со телесен инвалидитет имаше и културно забавна содржина. Настапија „Распеани Струмичани“ и ансамблот „Фолклорна низа“, а за целосната забава се погрижија Таки и Анела.
Лицата со телесен инвалидитет потврдувајќи ги своите слаткарски вештини, преку оваа манифестација упатија заедничка порака дека и тие можат и умеат, како и останатите членови на заедницата.
