Струмичани се простија од Џочето – момчето кое секогаш беше во ритамот на музиката тропајќи на тапаните, и на маса, и на колената

Со минута молк, со аплауз, со пеење на песната „За сваку добра реч – хвала“, вработените во Основното музичко училиште „Боро Џони“ од Струмица се простија од свој млад колега Џоко Ѓоргиев, кој трагично загина во страотниот пожар во Кочани, како тапанар на бендот на ДНК.

На Комеморативната седница која се одржа во концертната сала на ова училиште, директорката Клара Патарова говорејќи за Џочето кажа дека тој секој ден не пречекуваше тропајќи и со нога и со раце, ту на коленото, ту на масата.

„Ритамот на песните излегуваа од тебе во секој миг и кога зборуваше и кога јадеше и кога ги извршуваше работните задачи. Ти заслужуваш за тебе да сме силни и да го чуваме твојот спомен со гласно говорење, но и да го продолжиме твојот пат низ славење на музиката и афирмација на тапанот, она што беше ти“ – кажа директорката Патарова.

Таа подвлече дека Џоко како и секогаш така и сега успеал на едно место да собере голем број луѓе, бидејќи беше златно дете кое со своето чукање во тапаните ги освојуваше срцата.

„Надвор од оваа просторија има уште стотици, илјадници луѓе со истото чувство, дека загубиле дел од себе, некој свој оти кој тебе не те сакаше златно дете. Како и досега ти умееш да ги сплотиш луѓето и токму со твојата се присутна енергија што ја ширеше, сега црпиме сила да го прифатиме она што не може да се промени“ – кажа Патарова.

25-годишниот Џоко Ѓоргиев важеше за дете кое ја сакаше сцената и тапаните и немаше музички настан или манифестација во Струмица без негов музички преформанс како што беше и за време на „Коцертот под маски“ на музичкото училиште за време на Струмичкиот карневал.

По Комеморативната седница на ОМУ „Боро Џони“ на која присуствуваше и неговото семејство, во 12:00 часот во Градската капела во Струмица беа изложени посмртните останки на Џоко Ѓоргиев, каде голем број струмичани, роднини, колеги, пријатели за последен пат се простија од него. Во 15:00 часот беше испратен во вечниот дом на Градските гробишта во Струмица. Погребното опело го изврши викарниот Епископ Стобиски, заедно со свештенството и монаштвото на Струмичката православна епархија.