Основачот на струмичкото студио „One Way Dance Studio“ и интернационален судија при IDO (Интернационалната танцова организација), Панче Димов, е избран за претседател на Македонската асоцијација за модерни танци. Одлуката била донесена на изборите што се одржаа вчера во Скопје, на кои учествуваа претставници на повеќе студија и клубови од земјава што негуваат модерни и ритмички танци.
Со изборот на Димов, Асоцијацијата добива ново раководство за наредниот мандат. За потпретседател е избрана Катерина Јолакоска, за генерален секретар Трајче Петковски, за судиски директор Емилија Достинова, а за спортски директор Илија Карадакоски.
Панче Димов во изминатите години преку „One Way Dance Studio“ од Струмица беше иницијатор и организатор на бројни национални и меѓународни натпреварувања во модерни танци, со што Струмица ја позиционираше како значајна танцова дестинација. На овие настани учествуваа илјадници танчери од земјава и странство, кои имаа можност да се натпреваруваат и афирмираат токму во градот под Царевите Кули.
„One Way Dance Studio“ функционира од септември 2017 година, а неговите членови активно учествуваат на повеќе културни настани и младински иницијативи во Струмица, Македонија и во повеќе европски земји.
