Струмица ја чествуваше 81-та годишнина од убиството на Народниот херој Благој Јанков Мучето

Пред бистата на Народниот херој Благој Јанков Мучето во малиот градски парк во Струмица денеска беше одбележана 81-та годишнина од убиството на Мучето.

За животот и делата на Благој Јанков Мучето говореше Ице Беличев, член на Советот на општина Струмица.

„Благој Јанков Мучето, најсветлиот лик од струмичкиот времеплов, личноста која ја заслужува должната почит на секој оној кој ги љуби минатото, сегашноста и иднината на својот роден град, на секој оној кој искрено ја сака Струмица. Токму поради тoa повторно се собравме за да ја одбележиме 81-годишнината од денот на неговото загинување, но и да се потсетиме, кој беше Благој Јанков и за каква идеја се бореше и го положи својот живот. И до ден денес, но и за вечни времиња, останува да се каже дека Народниот херој Благој Јанков Мучето, беше, е, и ќе биде наша струмичка гордост. И затоа во мое, во Ваше име и во името на цела Струмица, бескрајно му благодарам за се што направи за овој град и за сите поранешни, сегашни и идни генерации струмичани“ – кажа Беличев.

По одржаниот говор за Мучето, претставници на Советот на општина Струмица, струмичката организација на Сојузот на борците и нивни поддржувачи, политички партии и јавни установи положија свежо цвеќе пред бистата на Мучето, а стихови за Благој Јанков Мучето кажуваа членови на рецитаторската секција при Домот за деца и млади кој го носи името на Народниот херој.

„На 14 јули 1944 година бугарскиот фашистички окупатор во Струмица го убива Благој Јанков-Мучето (3 јуни 1911 – 14 јули 1944) народен херој на Македонија, револуционер и комунистички деец. На неговата мајка не ѝ било дозволено да го земе телото и да го погреба својот син, а бугарските власти го фрлиле кај реката Тркајна. Но, посмртните останки на Благој потоа се пронајдени и погребани. Мучето бил жесток противник и на политиката на бугарскиот окупатор за асимилација на македонскиот народ“. Ова го има напишано историчарот-кустос Емилија Петковска, сега почината, во својата научна статија со наслов „Струмичкиот народен херој“, која е објавена во зборник на Заводот за заштита на спомениците и Музеј на Струмица во 2014 година.

ФОТОГАЛЕРИЈА