Струмица ја има најубавата и најголемата Детска градинка во Македонија – премиерот Ковачевски им го даде клучот на децата

Во Струмица од денеска и официјално, после 40 години е отворена нова, најубава и најголема Детска градинка во државата – „Виножито“, која е изградена во новата населба на просторот од некогашната касарна на ЈНА.
Новата градинка „Виножито“ е со капацитет за околу 300 деца од предучилишна возраст, распоредени во 14 групи и три јаслени групи. Изградена е во рамките на Проектот за подобрување на социјалните услуги кој го спроведува Министерството за труд и социјална политика со финансиска поддршка на Светска банка, а свое учество во изградбата имаше и Општина Струмица.
Покрај тоа што со градинката се решава долгогодишниот проблем со сместувачки капацитети во предучилишното образование во градот и околината, новиот објект обезбедува современи просторни услови за престој на децата прилагодени на нивната возраст и на образовниот метод за учење преку игра. Таа претставува еколошки објект и во градбата се имплементирани највисоки стандарди за енергетска ефикасност. Со сите овие современи инсталации значајно се намалуваат редовните трошоците за работа на градинката и се влијае врз намалувањето на емисиите на јаглерод диоксид во воздухот, а изграден е и систем на соларни панели. Целата инвестиција чинеше околу 126 милиони денари, односно над 2 милиони евра.
На отворањето на градинката присуствуваа и премиерот Димитар Ковачевски, министерката за труд и социјална политика, Јована Тренчевска, домаќинот, струмичкиот градоначалник Костадин Костадинов и претставникот на Канцеларијата на Светска банка во Македонија, Бојана Нацева.
Клучот од вратата на главниот влез на градинката „Виножито“, премиерот Ковачевски им го предаде на децата, а тие му посакаа добредојде со струмички чурек и локум. Нему и на сите гости кои присуствуваа на отворањето во прекрасно адаптираниот простори за приредби им подготвија неколку музичко-сценски изведби.
ФОТОГАЛЕРИЈА