![almak](https://strumicanet.com/wp-content/uploads/2025/07/1080x206-srnet-optimized.png")
Општина Струмица и официјално стана членка на Мрежата на силни градови во светот. Во своето видеообраќање на Фејсбук, градоначалникот на општина Струмица, Костадин Костадинов кажа дека e горд што успешното работење на Општина Струмица и справувањето со негативните последици во севкупното живеење е препознаено и на меѓународно ниво од реномирана меѓународна организација.
„Преку локалниот Совет за превенција и сите тамошни партнери: СВР Струмица, УЈП – Секторот за инспекциски работи и локалните инспекции дадоа огромен придонес во овој голем успех на нашата Струмица. Справувањето со предизвиците и нивната превенција ќе продолжи до крајот на мојот мандат. Нека ни е со среќа уште едно меѓународно признание“ – кажа Костадинов.
Во известувањето на Мрежата на силни градови се наведува дека Струмица им се придружува на повеќе од 210 градови и општини низ светот, посветени на застапување, спроведување и споделување на локални пристапи за справување со сите форми на екстремизам, поларизација кои можат да доведат до насилство.
Со признанието како членка на Мрежата на силни градови во светот, што го добива Општина Струмица се отвора можноста за поголема соработка со светски метрополи, но и добивање конкретна поддршка за решавање на одредени проблеми.
Ова признание доаѓа откако Костадинов беше дел од Регионалниот хаб на Мрежата за западен Балкан организиран од Стејт департментот на САД, каде ги презентираше конкретните примери на решавање на проблемите преку Локалниот совет за превенција на Струмица чиј модел беше преземан од повеќе општини од Црна Гора.
Инаку, Струмица го има најфункционалниот Совет за превенција каде граѓани во соработка со локални и национални институции ги детектираат проблемите при што нудат решенија како да се надминат. Во решавањето се вклучени сите чинители при што ја следат и имплементацијата. На тој начин во Струмица се реши проблемот со уличната трговија, проблемот со уличните кучиња, насилството, препродавачите на девизи но и други проблеми.
