„Струмица интернационал класик фестивал“ прераснува во традиционален – струмичани ќе уживаат во камерната музика од 2 до 10 јуни

Традиционално, веќе четврта година во Струмица од 2 до 10 јуни ќе се одржува фестивалот на камерна музика, единствен од ваков вид во Македонија – „Classic International Festival Strumica 2025“.

Денеска на прес конференција во Скопје главниот иницијатор на овој фестивал, еден од најпознатите светски обоисти и долгогодишен член на Македонската филхармонија, на Скопскиот дувачки квинтет и на Камерниот оркестар Скопски солисти, струмичанецот м-р Васил Атанасов, кој заедно со неколку професионални музичари од Филхармонија, Опера и колеги од Музичкото училиште „Боро Џони“ во Струмица го осмислија концептот на фестивалот, кажа дека во еспанзија е камерната музика и се радува што годинава ќе донесат гости од други држави.

„Од Чешка ќе дојде одлична примадона. Годинава ќе има пет концерти. Отворањето ќе биде со Катерина и Глигор Гелебешеви, истакнати наши уметници и професори. Ќе настапи квартет од Бугарија, флејта, виола, виолончело и контрабас, под водство на професорката Петја Багоска. Потоа е камерното дуо од Чешка, со певицата од Прашката опера, Павлина Сениќ. Во црквата „Св. Петнаесет Тивериполски свештеномаченици“ во Струмица ќе настапи хорот „Злата Мегленска“. Ќе има настап и саксофон квартет од Македонија, под раководство на професорот Горан Кавраков, кои ќе настапат со музика од Бах до филмска музика и обработки“ – кажа Васил Атанасов кој воедно е и селектор на програмата на „Classic International Festival Strumica“.

Концертите ќе се одржуваат во Центарот за култура „Антон Панов“ во Струмица и еден концерт во црквата „Св. Петнесет Тивериополски свештеномаченици“.

Фестивалот е поддржан од Општина Струмица и Министерството за култура и туризам.