Фејсбук статус на еко активистот Стојан Велков Трн во пресрет на утрешниот протестен марш низ улиците на Струмица „Забрането дишење“, закажан за во 11:00 часот од пред Домот на АРМ во Струмица.
„Во последниве неколку години, како некој нов вид политички тренд и стратегија, функционерите против кои протестираме затоа што не работат правилно и совесно, на изненадување на сите се појавуваат на протестите. За многу луѓе е несоодветно, политичари или високи функционери сами да се повикуваат и да одат на протести, што всушност се испровоцирани од нивното застрането работење на јавната функција за која се гласани. Нивното значи дека и тие се незадоволни од својата работа, па дошле да изразат незадоволство против самите!? Се прашувам, зошто не си организираат протест сами против себе?!
Лично мислам дека тоа е апсурд, бессрамност и безобразие! Смислена стратегија во која има обиди за омекнување, подривање и кршење на јадрото на оние кои имаат потреба да протестираат. Евтини обиди да се добијат политички поени!
Овие луѓе, шансата за промена ја имаат секојдневно во своите раце преку својата позиција и функција. Протестите се организираат за да ги разбудат и потсетат властите и институциите да почнат да си ја вршат својата работа најефективно што може и да ги испорачаат ветените резултати. Протестите се директно потсетување од луѓето дека водачите скршнале од патот и дека нема да отстапат од своите барања.
Од друга страна пак, во изминативе неколку дена имаше реакции од луѓе кои реагираат на изјавите на политичките партии и функционери дека ќе присуствуваат на протестот. И тие се прашуваат дали е тоа здраворазумно и правилно, што можам да го разберам.
Но, тоа што не можам да го разберам се исказите на луѓето дека заради таквите потези на властите, тие немало да се појават на протестот! А тоа, за мене, е уште поголем апсурд и од оној на функционерите „протестирачи“!
Зошто?
Затоа што такви „политички“ трикови не можат да ве скренат од вистинската цел. Доколку се колебате, тогаш тие ја постигнале целта, а тоа е вашето неприсуство на протестите, креирање сомнежи за самиот протест, креирање разноразни чаршиски муабети кои имаат цел да го деградираат и разорат бунтот итн. И сето тоа има за цел да ве расколеба и да направи да се посомневате во вашата лична одлука активно да реагирате кон неправдите што се случуваат. А во тој момент значи да ве откажат од борбата за чист воздух за нас и нашите поколенија!
Се прашувам, зарем толку малку треба некој да го скрене скрене човека од патот?
Јас, како дел од организацијата на протестот, сакам да ве потсетам дека протестот утре е против загадениот воздух. На протестот можеби ќе дојдат и оние кои не се политичари, а со своите постапки го загадуваат воздухот. Ние, како организација, немаме ниту желба, ниту намера да преиспитуваме кој и од какви причини доаѓа. Ниту пак сме во координација со било која политичка партија или структура.
Ова е автентичен и силен револт на луѓето против загадувачите на воздухот и корумпираните политичари кои не превеземаат ништо во врска со решавањето на проблемот. И затоа, доколку политичарите се дрзнуваат да се впуштат во вакви игри, ќе ги повикаме и нив, ако толку сакаат да дојдат нека да дојдат, градоначалници, пратеници, министри итн. Но, како и досега, нема да дозволиме никој од нив да добие никаква шанса ниту да зборува на протестот, ниту да си прави политички маркетинг, туку како и со досегашните искуства ќе ги натераме директно да се соочат со оние кои полека, но сигурно умираме од отровниот воздух што го дишеме!
Загадениот воздух постои и само автентичен отпор ќе придонесе за решавање на проблемот!
Затоа, излези на протест и не калкулирај, за нашето и за здравјето на нашите деца се работи“ – напиша Стојан Велков Трн.
