Стотина специјалитети со праз, солени и благи, беа декустирани повторно на „Ден на празот“ во селото Градашорци

Стотина специјалитети со праз, солени и благи, подготвени од вредните домаќинки од општината Василево, денеска беа декустирани повторно на Манифестацијата „Ден на празот 2022“ во селото Градашорци.
Дворот на Црквата „Св. Никола“ беше полн со гости од струмичкиот регион, но ги имаше и од други краеви на државата. Тука беше и заменик амбасадорот на НР Кина во Македонија, Мао Кингвен, директорот на Конфиндустриа, Енрико Раиноне, Махмуд Елколали – инвеститор од Египет и претседател на Меѓународна федерација на бизнисмени и инвеститори, пратеници, градоначалници, гости од соседна Бугарија, сите дојдоа да ги вкусат специјалитетите направени за ова традиционална манифестација, која по пауза од две години поради пандемијата, како што кажа градоначалникот Славе Андонов, се врати во полн сјај.
Најдобриот праз е од регионот околу Градашорци, секој подготвен специјалитет со градашорскиот праз има поинаков вкус, велат домаќинките и затоа е најбараниот насекаде во Македонија. Ова манифестација е промоција токму на овој баран праз како земјоделска култура и овој регион каде тој најмногу се одгледува.
Манифестацијата беше збогатена и со културно уметничка програма на која со свои изведби настапија ученици од основните училишта „Гоце Делчев“ од Василево и „Атанас Нивичански од Нова Маала, Културно уметничките друштва „Сушевски бисери“ од Сушево и КУД „Цветови“ од Дедино, а вистинско расположение на отворено направија момците од „Next Time“.