Стартува 61-то издание на Меѓународната Струмичка ликовна колонија

Од денеска до 15 август, Струмица по 61-ви пат ќе биде домаќин на 20-тина ликовни уметници и мозаичари од Турција, Полска, Чешка, Бугарија, Србија и Македонија. Почна Меѓународната Струмичка ликовна колонија 2024. Во рамките на колонијата по 32-ри пат ќе се одржи и Мозаичка работилница, основана од академик Газанфер Бајрам и е единствена во Македонија каде се негува оваа најстара сликарска техника и дициплина – мозаикот.

Дваесетте уметници во наредните десет дена ќе создаваат нови дела, со кои ќе го збогатат фондот од над 2800 уметнички дела создадени од над 1600 уметници во изминатите 60 години.

Новите дела од годинашното издание на Струмичката ликовна колонија традиционално ќе бидат претставени на изложба на 11-ти септември, денот на ослободувањето на градот Струмица.

Меѓународната Струмичка ликовна колонија е најстарата и најпозната на Балканот и поширокиот регион, која се одржува секоја година во месец август. Неа во далечната 1963 година ја создале Кочо Урдин и Љупчо Апостолов, а во првите години се одржуваше во Работничкиот Универзитет во Струмица. Денес организатор и домаќин на ликовната колонија е НУ Центар за култура „Антон Панов“.