![almak](https://strumicanet.com/wp-content/uploads/2024/11/srnet-banner-noe-2-optimized.png")
На прв поглед чиниш цртани се, истурени бои на подлога, а такви слики прават само ликовните уметници. Тоа е првиот впечаток кога ќе влезете во фоајето на Центарот за култура „Антон Панов“ во Струмица, каде е поставена Изложба, но не на слики, туку на фотографии направени од Сречко Гунчев, професионален фотограф. Дилема меѓу посетителите, па Сречко мораше да им ја дообјаснува содржината на фотографиите, што е што на изложената фотографија. Навистина нешто фасцинантно, нешто што секоја фотографија ќе ве замислува и ќе бара да ја откриете нејзината содржина, а ретко кој на прв поглед ќе ја открие, ако авторот не ви го објасни секој нејзин дел.
„Гунчев со својата умешност низ крајно трансформирана линија и колоритност отвора еден нов хоризонт кој степенот на апстракција води кон патување определен од сопствениот начин на доживување на природата. Во неговите дела можеме да забележиме поглед кој авторот ги организира своите асоцијации, внатрешни вибрации, ослободувајќи ја онаа енергија којашто создава сопствена калиграфија, хармоничен колорит кој блеска со оптимизам и животна радост. Ако уметноста е желба на човекот, да се изрази себе, да ги забележи своите реакции, своите особини во светот во кој живее и помогне да се промени на подобро, Сречко Гунчев има причина да биде задоволен од она што го работи, бидејќи неговите дела вибрираат среќа, радост, задоволство и се е поетска и драматична манифестација на поимот радост на живеењето“ – кажа ликовниот уметник Александар Филев промовирајќи ја изложбата „Апстрактни вибрации“ на Сречко Гунчев.
Познатиот струмички фотограф, Сречко Гунчев, вработен во Центарот за култура во Струмица скоро 30 години ги има фотографирано сите театарски претстави и културни настани кои се одржувале во струмичкиот Храм на културата. Ги овековечувал со фотографии Струмичкиот карневал, ФКТ „Ристо Шишков“, Струмица Опен фестивал и уште многу други културни и спортски настани. Неговата посветена работа е признаена и наградена во 2017 година со доделувањето на Годишната награда на Општина Струмица – „Свети Петнаесет Тивериополски свештеномаченици“.
Ова е седма самостојна изложба на фотографии на Сречко Гунчев во изминатите 10 години, а последната „Апстрактни вибрации“ на која се изложени 30-тина дела, граѓаните ќе можат да ја видат во наредните 15-тина дена во фоајето на Центарот за култура „Антон Панов“ во Струмица.
