Националната установа Завод за заштита на спомениците на културата и Музеј – Струмица повторно ја стави во функција за посетители Спомен куќата на народниот херој Благој Јанков – Мучето, откако во изминатиот период се направи комплетно реновирање, реконцепција, конзервација и заштита од страна на стручни тимови на оваа установа.
На свеченоста, на која покрај голем број граѓани присуствуваа и премиерот Христијан Мицкоски, министерот за култура и туризам, Зоран Љутков, потпретседателот на македонското Собрание, Антонио Милошоски, директорот на Завод и Музеј Струмица, Бранко Ѓоргиев кажа дека со отворањето на овој објект ја чуваме историјата и културата, ја негуваме традицијата и ја пренесуваме пораката на храброст, пожртвуваност и љубов кон татковината на идните генерации.
„Националната установа Завод за заштита на спомениците на културата и Музеј – Струмица со овој проект отвора ново поглавје во зачувувањето на историјата, културата и традицијата, овозможувајќи на идните генерации да ја почувствуваат автентичната меморија на едно време исполнето со борба, храброст и пожртвуваност“ – кажа Ѓоргиев.
Министерот за култура и туризам, Зоран Љутков во своето обраќање кажа дека со гордост и чувство на одговорност објавуваат за завршена целосната реконструкција и обновата на музејската поставка во Спомен-куќата на овој херој.
„Овој објект, кој повеќе од пет децении сведочи за животот и делото на Благој Јанков Мучето, денес добива нов лик и нов дух. Вратен е автентичниот изглед на куќата. Поставени се современи музејски витрини и збогатена е поставката. Изграден е помошен објект за презентации, промоции и едукативни работилници. Просторот околу музејот е целосно уреден. Ова не е само техничка интервенција, ова е инвестиција во идентитетот, културата и историската меморија на Македонија“ – кажа Љутков.
