Со „тешко“ срце Костадинов му го даде клучот на Цицимов – почна Струмичкиот карневал

Не сакаше баш, ама мораше, со „тешко“ срце го даде, ут кога Калајџиита му ја кажа „как знааш да знааш, прај шо ќе прааш, ама кључо ут градо мора да го дааш. Карневаџиите наши главни мора да бидат, па лезет ут власта и они малко да видат“… и даде му го градоначалнико на Цицимов.

Во карневалски стил, со дефиле од „собранието“ до плоштадот во придружба на градскиот оркестар, со клучот на градот во рацете на мажуретките, со млади карневалисти на плоштадот и симболичното предавање на клучот, градоначалникот на Струмица, Костадин Костадинов го означи почетокот на годинашното издание на интернационалната манифестација, вековната традиција на струмичани „Струмички карневал“.

„Дочекавме уште еден симболичен почеток на Струмичките карневалски свечености, кои цели осум дена, од денеска, па се до 1 март, ќе бидат наше добро утро, добар ден и добровечер, а Струмица ќе биде центар на светот, како што се вели во химната на Струмичкиот карневал. Токму затоа, со многу радост го предавам „клучот на градот“ во рацете на струмичките карневалисти кои „од среда до среда“ ќе бидат стопани на Струмица. Иако станува збор за симболика во ова примопредавање, сепак теба да се знае, дека и со клуч и без клуч, Струмица секогаш е отворена и гостопримлива за сите добронамерници од земјата и странство“ – кажа градоначалникот Костадинов.

Претседателот на карневалистите Александар Цицимов, откако го прими клучот од градоначалникот на Струмица му даде чесен пионерски збор.

„Ветуваме дека ќе направиме уште едно убаво издание и дека овие осум дена на наша власт Струмица ќе биде отворена со отворено срце за сите оние коишто ги сакаат и почитуваат карневалските свечености“ – кажа Цицимов.

ФОТОГАЛЕРИЈА