Со спасувачка вежба струмичките пожарникари го одбележаа 20 Мај – Денот на македонските пожарникари

Денот на пожарникарите во Македонија, пожарникарите-спасители од ТППЕ Струмица го одбележаа со спасувачка вежба во случај на земјотрес и пожар во ООУ „Никола Вапцаров“ во Струмица.

„И понатаму продолжуваме со нашиот професионален однос и посветеност кон работата и нашата мисија во градењето на сигурноста и безбедноста на граѓаните, материјалните добра и природните богатства на нашата земја“ – вели комадирот на ТППЕ Струмица, Александар Гудев по повод празникот на пожарникарите.

„Вашата храброст, пожртвуваност и професионалност ги потврдивте и денеска на симулациската вежба „Евакуација на учениците и вработените после настанат земјотрес и избувнување на пожар, како и пребарување и спасување на повредени” во ООУ „Никола Вапцаров“. На вашата посветеност и професионалност во заштитата на нашите животи и имоти, секогаш ќе ви враќам со максимална поддршка лична за вас и за капацитетот на ТППЕ Струмица како и досега, со награди и субвенции, бесплатен паркинг и јавен превоз, набавка на нова опрема“ – вели градоначалникот Костадин Костадинов кој денеска заедно со претседателот на Советот на општина Струмица, Марјан Даскаловски и членови на Советот присуствуваа на спасувачката вежба која се одржа по повод Денот на пожарникарите.

Денешниот датум, 20-ти мај, во Македонија е прогласен за Ден на македонските пожарникари. Утврден е во чест на формирањето на првата противпожарна единица во Битола, во 1836 година, што претставува темел на оваа професија во земјава.