Со концерт во клубот „Деца на сонцето“ почнаа Деновите на пијаното

Во организација на Здружението „Камерата Ад Астра“ од вчера до сабота во Струмица се одржуваат „Денови на пијаното“, а по повод светскиот ден на пијаното, 28 Март.

Првиот концерт се одржа вчера на пладне во Клубот „Деца на сонцето“ во кој членуваат деца со Даун синдром и лица со попреченост, а беше насловен „Заедно кон ѕвездите“. На него со познати изведби се претставија младите таленти Лиза, Елизабета, Даријан, Павел, Лука, Марко, Наум и Ана.

Вториот концерт се одржа попладне во 18:00 часот во Основното музичко училиште „Боро Џони“ во Струмица.

„Полно љубов кон музиката, полно со емоции, полно со енергија, полно со жар и уште многу полно… Кажавме и на самиот крај, сме присуствувале на безброј концерти, сме организирале во овие две и пол децении стотина концерти, но вечерва беше сосема различно. Беше посебно убаво. Полно. Треба да се доживее тоа што не може да се раскаже“, напишаа организторите.

Тие велат дека концертите се замислени како еден вид интерактивна комуникација преку презентирање на инструментот пијано, да се слушне како се изведува музика за пијано, учесниците да го запознаат инстументот, односно еден вид на интерактивна работилница.

„На тој начин ги поддржуваме и кажуваме дека се дел од нашето општество и можат да учествуваат на нашите концерти и да ги посетуваат, бидејќи на осумте концерти се пријавија 77 учесници на возраст од 7 до 52 години“, велат организаторите.