Со велосипедско дефиле во Струмица одбележан Светскиот Ден без автомобили и Европската недела на мобилност

Со велосипедско дефиле по улиците во централното градско подрачје во кое учествуваа ученици од основните и средните училишта, „Јуроп Хаус“ Струмица денеска го одбележа Светскиот Ден без автомобили и Европската недела на мобилност во соработка со Општина Струмица и Министерството за животна средина и просторно планирање.

„Оваа година, темата гласи: „Заштедете енергија“ која го нагласува влијанието што одржливите транспортни решенија го имаат врз климатските цели и врз енергетската и мобилна сиромаштија. Тоа подразбира, преземање активности кои ги охрабруваат луѓето да одберат користење на јавен превоз, возење велосипед, да се одлучат за пешачење како и други „чисти“ транспортни решенија, наместо секојдневното користење автомобили. Неопходно е нашите навики за мобилност да бидат во функција на штедење на енергијата, и притоа тие да бидат дел од заедничките – колективни напори. Општина Струмица, во тој поглед прави се што е во доменот на нејзината надлежност, преземајќи чекори кои водат кон целта – одговорна и енергетски одржлива општина. Ние сме на вистинскиот пат таа цел да ја достигнеме“ – кажа Томислав Андреев, раководител на Одделението за заштита на животната средина.

Струмица е еден од трите илјади градови од околу 59 земји ширум светот, кои ја одбележуваат Европската недела на мобилност, а која претставува водечка кампања на Европската Комисија за подигање на јавната свест за одржлива и урбана мобилност.