„Социјалната населба“ се гради според планираната динамика, обезбедени дополнителни 65 милиони денари

Општина Струмица за реализација на проектот „Социјална населба“ ќе добие нови 65 милиони денари. Градоначалникот Костадин Костадинов и министерот за транспорт и врски Благој Бочварски денеска го потпишаа Договорот за финансирање на овој капитален проект на кој веќе се работи во делот на инфраструктурата.

Минатата година во октомври струмичката фирма „Жикол“ го доби тендерот за реализација на првата фаза од овој проект. Таа за 1,5 милиони евра треба да изведе сообраќајна инфраструктура, потпорна конструкција, улично осветлување, фекална и атмосферска канализација. Станува збор за површина од околу 3,3 хектари на која треба да се подигаат стотина типски куќи во кои ќе се сместат домаќинствата кои живеат покрај „транзитниот пат“, односно на „Климент Охридски“, како и социјално загрозени семејства.

„При крај се градежните активности од првата фаза во делот на нискоградбата која чини 100 милиони денари, а опфаќа реализација на пристапна улица, изведба на планирани платформи за куќи, потпорни ѕидови и инфраструктурни активности. Денеска потпишав договор со министерот за транспорт и врски Благој Бочварски и преку Владата обезбедивме 65 милиони денари за втората фаза од изградбата на населбата. Социјалната населба е еден од најголемите капитални проекти за кој требаше голема храброст и силна одлучност, а кој се решава повеќедецениски проблем во долното и горното Турско маало во Струмица“, напиша Костадинов на Фејсбук.