СДСМ Струмица реагира: Кој се обидува да се сокрие зад некогаш реномираниот ТВ Канал ВИС?

Во изминатиот период, струмичката јавност се прашува, а ние како партија, јавно ќе го поставивме прашањето: Кој раководи со фејсбук каналот на некогаш реномираната ТВ Канал ВИС – Струмица, која во моментот не постои, односно не се емитува програма, нивниот веб-сајт не е ажуриран, а исто така не постои ниту лице за контакт. Сето тоа, може да се забележи и од последниот извештај на АВМУ во 2024 година.

Откако беше објавен кандидатот за градоначалник од редовите на СДСМ Струмица за претстојните локални избори, Марјан Даскаловски, интензивно на споменатата Фејсбук страна се појавуваат лесно забележливи измислени анкети, текстови и рекла-казала муабети, со цел да му се наштети на кандидатот за градоначалник на СДСМ Струмица, иако јавноста во нашиот град добро ја знае вистината.

„Уредниците“ на ТВ Канал ВИС, веројатно знаат дека за објективно известување, при секоја приказна треба да побараат став од двете страни. До овој момент, ниту еднаш, никој од СДСМ Струмица, ниту од кандидатот за градоначалник Марјан Даскаловски, не се побарани за изјава од новинари на споменатиот медиум, што дополнително фрла сомнеж дека зад овој канал всушност нема новинари, туку лице кое со помош на вештачка интелигенција се обидува да наметне мислење кај струмичани.

Јавно ги повикуваме, воедно и прашуваме, двете македонски здруженија на новинари, ЗНМ и МАН, како и Советот за етика во Медиумите (СЕММ), да одговорат дали медиумот е нивен член и истиот го почитува Кодексот на новинарите на Македонија? И зошто, ако медиумот е независен како што посакува да се прикаже, ги бриша коментарите кои не им одговараат на нивната стратегија?

СДСМ Струмица како партија, секогаш била на страна на медиумите, на страна на вистината, на страна на струмичани. Така ќе биде и овојпат. Јавноста треба да ја знае вистината, јавноста заслужува објективно и вистиното информирање, а не злоупотреби. Kој стои зад медиумот и кој свесно шири лаги во јавноста? Вистината секогаш излегува на површина, така ќе биде и овојпат!

ОО на СДСМ Струмица