СВР Струмица реагира на објави кои изминатите денови се објавувале на социјалните мрежи за наводен „линч“ врз семејство

Секторот за внатрешни работи Струмица ги демантира информациите кои беа пласирани во некои пишани медиуми поврзани со наводен „линч“ врз семејство од Струмица.
Сакаме да ја информираме јавноста дека во претходниот период, односно во месец Август во Секторот за внатрешни работи Струмица лицето А.Т. (21) од Струмица пријави дека И.Ј (40) од Струмица и Ф.С. (35) од Скопје му вршеле притисок со закани по живот на оштетениот и неговата фамилија притоа наведувајки го да им плати сума на пари за кој истиот не бил должен, а од страв истиот им ја давал сумата која ја принудувале да им ја плати (во пари или останати вредни предмети), со што пријавителот А.Т во период од една година бил оштетен за сума од 20.000 евра.
По преземените мерки и обезбедените докази против лицата И.Ј. и Ф.С. беше поднесена кривична пријава поради сомнение за сторено кривично дело „изнуда“ по чл. 258 од Кривичниот закон, а по поднесената пријава од страна на Основен суд Струмица на осомничениот И.Ј. на 12.08.2022 година му било донесено Решение со изречени мерки на претпазливост „забрана за напуштање на живеалиште во Струмица“, „обврска секој понеделник во 08.30 да се јавува на судска полиција Струмица“ и „одземање на патна исправа на име И.Ј“.
На 30.10.2022 година околу 01:00 часот во СВР Струмица А.Т. пријавил дека пред неговиот дом на улица „Димитар Цветинов“ во Струмица му бил запален неговиот мотор марка „Кавасаки“, кој бил изгаснат по интервенција на Територијалната Противпожарна единица на Струмица.
Во моментот кога полициски службеници преземале мерки по овој настан, а полицискиот службеник Д.П. вршел службени дејствија кон Д.П. дошло патничко моторно возило „Ауди“ управувано од И.Ј. (40) од Струмица, кој и покрај даден знак од полицискиот службеник да застане продолжил да се движи со возилото и со истото удрил во полицискиот службеник, а тој паднал на земја. По кратко време И.Ј. со зголемена брзина на возилото повторно се вратил кон полицискиот службеник Д.П. при што истиот испукал во воздух два предупредувачки куршуми, но поради тоа што возачот не застанал, Д.П. скокнал на тротоарот за да не биде повторно удрен, а возачот со возилото побегнал од местото.
Како што информиравме во билтен од 31.10.2022 година на 30.10.2022 година полициски службеници од Полициската станица Струмица го лишиле од слобода И.Ј. (40) од Струмица затоа што околу 02.20 часот на улица „Димитар Цветинов“ во Струмица со патничко моторно возило „ауди“ удрил полициски службеник кој извршувал службени задачи, по што го напуштил местото. Од страна на СВР Струмица до Основното јавно обвинителство Струмица на 31.10.2022 година е поднесена кривична пријава против И.Ј. поради сомнение за сторено кривично дело „ Напад врз службено лице при вршење работи на безбедноста“ по член 383 ст.2 од КЗ.
На 31.10.2022 година во СВР Струмица А.Т. пријавил кривично дело „незаконито влијание врз сведоци“ сторено на 29/30.10.2022 година околу 00:00 часот во Струмица, според кое повеќе лица меѓу кои и Б.С. од Струмица откако го сретнале во центарот на Струмица му пренеле закани од И.Ј. дека ќе му бидат запалени моторот и куќата, а Б.С. и физички го нападнал. Истата вечер и Ф.М. му пренел дека И.Ј. од него побарал да го однесе пријавителот на место каде ќе се сретне и „пресмета“ со него. Поради наведеното постои сомнение дека И.Ј. го сторил кривичното дело „предизвикување општа опасност“ со палење на моторциклот сопственост на А.Т.
Во врска со наводите кои исто така беа истакнати во текстот поврзани со напад на И.Ј. и членови на неговото семејство Ве информираме дека на 30.10.2022 година во Полициската станица Струмица се пријавени вакви настани, кои се евидентирани и од страна на полициски службеници се испитани и против сторителите ќе бидат поднесени соодветни пријави.
Поради наведеното, најстрого ги демантираме невистините кои беа објавени на некои пишани портали, истакнувајќи дека И.Ј. е лице осомничен за повеќе кривични дела, за кои против него во моментот се води постапка пред надлежниот суд, а полициските службеници од Секторот за внатрешни работи Струмица презедоа мерки по сите настани, притоа постапувајки професионално согласно законските правила и прописи, стои во соопштението од СВР Струмица.