![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Струмичани ја имаат можноста по долги години повторно да ги видат ликовните дела на светскиот познатиот диригент и композитор, ликовен уметник, роден во струмичко Пиперево, професорот Запро Запров.
Во Храмот на културата во Струмица од синоќа е поставена Изложба со 60-тина негови ликовни дела во кои се застапени фрагменти од македонската фолклорна и црковна традиција, а изложбата е насловена „Светлина“ и ова е 21-ва изложба на Запро Запров. Меѓу многубројните љубители и почитувачи на делата на Запров беа и рускиот Конзул, Константин Чеборатев и Конзулот на Монголија во Македонија, Литов Намдаг Џанчибин.
„Вечерва во овој простор го слушаме Манифестот на Запро Запров, нему му е дадено да го оствари насушното. Некој во оваа банална секојдневност мора да и дозволи на светлината да го прави онаа што е светлината вообичаено, или ова би било доволно да се препуштиме на радосното уживање пред огледалата на неговите сликарски рефлекси“ – кажа рецензентот на изложбата Вангел Божиновски.
Божиновски вели дека за да се препознаеме во вистината, за да не забегаме во егоизмот на портретот, да се загледаме во светлината во нејзината музика на сферите која сликарот ги оркестрира со бои.
Запро Запров вели дека овие дела ги создавал, не како спротивставување на македонската црковна иконографска традиција, напротив, како што кажа, со неговите слики дава свое видување и ја барал суштината на значењето и симболите на таа традиција.
„Немав намера да се спротиставам на тоа бесценето црковно богатство. Намерата ми беше од сопствен аспект, од современ аспект со современи ликовни изрази да создадам сопствен опус на дела кои ќе го изразуваат и времето и мене како личност“ – кажа Запров, потенцирајќи дека овој мал придонес го дава во интерес на зачувување на македонската посебност, македонскиот бит, традиција, идентитет, затоа што само со тоа можеме да се одбраниме од оваа современие, од овие напади, негирање на нашата самобитност, на нашиот идентитет.
Запро Запров е истакнат хорски диригент кој континуирано настапува во државава и во светот. Резултат од неговата севкупна музичка дејност се вкупно 109 (53 меѓународни и 56 државни) врвни награди и признанија, меѓу кои и наградата „11 Октомври“ за особен придонес во културата и уметноста. Зад себе има над 2500 концерти и настапи, над 1000 минути трајни аудио и видеозаписи, околу 20 радио и ТВ емисии, околу 700 изведени вокални, инструментални и вокално-инструментални дела од врвната светска музичка литература. Основач е на Детскиот хор „Изворче”, Женскиот хор „Рустико” и Хорското Студио „Рустико”, во чиј состав се Детскиот хор „Развигорче” и Женскиот младински хор.
Изложбата „Светлина“ на Запро Запров, во организација на ЛУБ „Благој Јанков Мучето“ од Струмица на показ пред струмичката јавност ќе биде достапна и во наредните десеттина дена во Центарот за култура „Антон Панов“.
