Новоформираниот „Родителски Фронт“ од Струмица, кој според најавите како Граѓанска организација ќе ги застапува и промовира традиционалните вредности и правата на децата, на плоштадот „Гоце Делчев“ одржа Информативен собир – протест поттикнат од родовата пропаганда и родовата идеологија која, како што велат, противзаконито и без согласност на родителите се инфилтрира во наставните програми во училиштата.
Претседателката на Здружението „Родителски Фронт“, Мариета Дукиќ вели дека децата не се сами и не се ничии експериментални глувци.
„Нашите деца имаат родители, имаат мајки и татковци кои живеат за нив, но подготвени се и доколку треба да умрат за нив. Токму на тој родителски фронт ќе ја изгубите војната за душите на нашите деца. Ние не ја започнавме, но ќе ја водиме до крај и победнички ќе ја завршиме“, кажа Дукиќ.
Таа во својот говор го обвини претседателот на Советот на општина Струмица, Марјан Даскаловски дека веќе три седници по ред, како што кажа, се става себеси, но и Советот во служба на родовите идеолози промотори во Македонија.
„Поголемиот дел од советниците неволно се повинува и попушта под притисоците и заканите наспроти своите убедувања и совеста. Ние почитувани, ги ободруваме и повикуваме советниците да се охрабрат и да ги затворат вратите за родовата пропаганда еднаш засекогаш во нашата општина. Да излезат од сенката на оној кој наместо книги во рака држи тефтер за вработување и други услуги, им врши притисок и нека се ослободат од стегите зашто тие се слободни луѓе, а Струмица не е див запад“ – кажа Дукиќ.
Учителката Марија Јанакова Кочева вели дека почнува да се губат основните вредности, како што е пристојноста. Таа порача да се остават децата сами да ја искусат љубовта, а за сексуалноста да зборуваат како што е и ред, со своите родители.
Професорката Ивана Пандева потенцираше дека родителите имаат полно право во своите деца да ги всадат традиционалните семејни вредности, без било кој да ги нарушува тие критериуми.
„Драги родители, заедништвото е најсилно. Заедно можеме да бидеме глас громовник кој ќе го покоси секое бреме кое надвиснува над главите на нашите најмили, на нашата радост, на нашата иднина“ – кажа Пандева.
„Никој од нас нема ништо против нашите сограѓани кои имаат поинаква сексуална ориентација, тоа е нивни избор и нивна одговорност, но имаме против наметнување на сексуален релативизам и џендер идеологија – флуидно разбирање на полот, преку кои се отвора можност за постепено морално труење на општеството до негово уништување. Доволно молчевме, ова не е во ред, не е прифатливо и нема да го дозволиме. Единствено право за одлучување во однос на животот, здравјето, среќата и образованието на децата имаат родителите. Тука се затвора во целост животниот круг на слободата и семејната симбиоза. Остануваме на фронтот“, порача адвокатката Нетка Ковачева.
Организирањето во „Родителски Фронт“ ги побуди родителите Прирачникот за животни вештини на Бирото за развој на образованието, меѓу кои и работните листови за учениците од средните училишта – Образование за животни вештини, објавени уште во 2011 година од тогашната Влада на ВМРО-ДПМНЕ, кој по 12 години станува главна тема со жестоки реакции на социјалните мрежи.
Инаку на настанот се собираа потписи – Петиција „НЕ за родовата идеологија во училиштата, актите и документите во општина Струмица“, а собирањето потписи ќе продолжи и во сабота на плоштадот „Гоце Делчев“ во Струмица.
