Нешто повеќе од половина од младите во Струмица (51.8%) никогаш досега немаат волонтирано. Најголем дел од испитаниците (44.8%) би волонтирале во граѓанскиот сектор, потоа 30.5% би волонтирале во приватниот и 24.8% во државниот сектор. Големо мнозинство 60.6% никогаш не работеле во група со цел решавање на некој проблем во општината. Околу една четвртина од нив (25.3%) делумно се задоволни од општината во која живеат, додека 24.7% се неутрални во однос на ова прашање. Двете работи кои најмногу им се допаѓаат на младите во општина Струмица се парковите (33.3%) и тоа што градот е Cентар за млади лица во регионот (21.7%).
Токму ова се главните наоди од истражувањето „Потреби на младите на локално ниво”, спроведено во општина Струмица, од Здружение на граѓани Младите можат, со финансиска поддршка на Европската комисија, во текот на февруари-март 2023 година. Истражувањето беше спроведено користејќи два пристапи: квалитативен пристап преку спроведување на една фокус група и квантитативен пристап преку спроведување на онлајн анкета, со дизајнирање на примерок според застапеност на млади луѓе во општината. Со онлајн истражување во општината Струмица се опфатија вкупно 170 испитаници, од кои 82 (48.2%) беа машки и 88 (51.8%) беа женски.
„Актуелната ситуација со младите на локално ниво, ја поттикна потребата да се добијат конкретни податоци за вклученоста на младите во процесите на донесување одлуки и нивното учество во општествените текови на локално ниво. Младите се фактор за промени, потенцијал за кој треба да се охрабрува и поддржува, пред се од нивните општества. Затоа, нивната улога во денешните општества е од големо значење за демократските процеси, па заради тоа нивното оспособување, развој и подготвеност се од клучно значење“, велат од Здружение на граѓани Младите можат.
57.6% од испитаниците не се запознаени со тоа што е младинска политика. Над половина од испитаниците (53.5%) никогаш не учествувале во креирање на програма или буџет за млади во рамки на нивната општина. Најголеми приоритети во областа на културата и спортот за младите се непостоење на културни манифестации за млади (39.0%), како и немање на игралишта и сали за спортски активности (31.3%). Големо мнозинство (62.4%) одговориле дека општината не е отворена за иницијативи од младите и дека општина Струмица нема финансиски да поддржи иницијатива од млади (68.8%).
Истражувањето „Потребите на младите на локално ниво“ е дел од проектот Младински Локални Банки. Во рамки на проектот се формираа три одбори на локалните банки во Струмица, Велес и Кочани. 30 млади стекнаа вештини за лидерство во заедницата, мапирање на проблеми и менаџирање со ресурсите на локалната банка. Во наредниот период се очекува отворање на јавен повик за поддршка на иницијативи од фондот на локалната банка, кој е формиран преку донации на локалната власт и локалната бизнис заедница. Целта на проектот е создавање на механизам за соработка помеѓу младите, локалната власт и локалната бизнис заедница.
