Радовската Коњаница по трет пат до славното Крушево – утрово го почнаа Илинденскиот марш

Утрово во 9 часот од селото Радово, општина Босилово, десет јавачи како дел од Радовската Коњаница тргнаа на илинденски марш до славното Крушево, каде на свеченоста по повод Илинден на 2 август ќе им се придружат на останатите коњаници од државата.

По утринската литургија во црквата „Св. Пророк Илија“ во Радово и благослов од нивниот свештеник, голем број жители на Радово и околината, градоначалникот на општина Босилово, Ристо Манчев и градоначалникот на општина Василево, Славе Андонов од каде има и еден жител во коњаницата, им посакаа среќен пат на јавачите.

Претоходно, вечерта се одржа Народен собир во чест на Радовската Коњаница и нивното заминување кон Крушево, а во забавниот дел настапи македонската фолк ѕвезда Елена Велевска и културно-уметнички друштва од регионот.

Дел од коњаницата се: Матеј Сирачев, Никола Сирачев, Стојанче Карамизичев, Игор Манолев, Ѓорги Сирачев, Никола Сирачев сите од Радово, Љупче Атанасов од Василево, Иван Наков од Иловица, Марјан Ѓоргиев од Просениково и Миланчо Томов од штипско.

Оваа организирање на Радовска Коњаница е на иницијатива на Здружението „Илинден“ од Радово, а како што кажа градоначалникот Ристо Манчев, Радовската Коњаница е гордоста на Општина Босилово преку која сакаме да бидеме дел од Илинденскиот марш за зачувување на традицијата, културата, македонските вредности и љубовта кон татковината, по пример на храбрите јунаци низ историјата на Македонија.