Пукна главната водоводна цевка која носи вода од браната „Иловица“ до Филтер станицата „Иловица“ – корисниците останаа без вода

Вечерва пукна главната водоводна цевка која носи вода од браната „Иловица” до Филтер станицата „Иловица“. Настанат е дефект со кој се спречува дотур на вода од браната до Филтер станицата кој е во надлежност на АД Водостопанство „Струмичко Поле“ Струмица, информираше вечерва преку „Фејсбук“ градоначалникот на општина Босилово, Ристо Манчев.

Тој најавува дека екипи од „Струмичко Поле” со помош на вработените од ЈПКД „Огражден“ од Босилово рано наутро ќе бидат на терен со цел побрзо отстранување на дефектот и повторно обезбедување вода за Филтер станицата „Иловица“.

Според објавата на градоначалникот Манчев, поради комплексноста на наведениот дефект, во текот на утрешниот ден, (четврток) без вода ќе бидат сите населени места кои користат вода од системот „Иловица“.

За сите новонастанати ситуации, за текот на активностите и обезбедувањето на вода, дополнително ќе информираат.