Професори од ДСУ „Никола Карев“ од Струмица беа во посета на Школскиот центар за стручна извонредност и тренинг во Нова Горица, Словенија

Државното средно училиште РЦСОО „Никола Карев“ од Струмица и Школскиот центар во Нова Горица, Словенија, кој е признат Центар за стручна извонредност и Меѓукомпаниски тренинг центар потпишаа Меморандум за соработка, со кој се воспоставува цврсто партнерство помеѓу двете институции.

Оваа соработка ќе овозможи размена на ученици и наставен кадар, заеднички истражувања, развој на наставни програми и технолошки унапредувања, осигурувајќи дека стручното образование останува модерно, иновативно и усогласено со потребите на индустријата.

Професори од струмичкото училиште беа во дводневна посета на Школскиот центар во Нова Горица каде преку конструктивни дискусии за управување со институциите, партнерства, модели на финансирање, кариерен развој, претприемничко учење и учење преку работа, домаќините им ја споделија својата приказна – патот до извонредност. Професорите од „Никола Карев“ имаа можност одблиску да се запознаат и со условите за настава во Школскиот центар. Нивното искуство и постигнувања беа драгоцена инспирација за идниот развој на училиштето.

„Учиме од најдобрите. Се прилагодуваме на новите предизвици. Стремиме кон извонредност. Ова е почеток на партнерство што ќе ја обликува иднината на стручното образование и ќе создаде нови можности за учениците, наставниците, партнерите во бизнис секторот и пошироката професионална заедница“ – соопштија од ДСУ „Никола Карев“.