Промовирана третата стихозбирка на Ице Беличев – „Мелодија на платно“ која во себе носи многу зборливи слики во боја

Пред многу народ во конгресната сала на хотелот „Сириус“ во Струмица синоќа беше промовирана книгата – стихозбирка „Мелодија на платно“ од професорот по македонски јазик, Ице Беличев.

Станува збор за трета стихозбирка на Ице Беличев, по „Гледач во небото“ и „Чекор помеѓу“, во која се напишани четириесет песни со најразлични теми и мотиви.

Професорката Ана Витанова Рингачева вели дека во поезијата на Ице Беличев има еден длабоко личен поглед на светот, светот во поетот и светот надвор од поетот, и тој поглед неминовно фрлен врз реалноста што го опкружува поетот станува некаква острица за повлекување линија меѓу топлите и ладните бои со коишто е насликан овој свет.

„Поетот не ги премолчува новите болести на времето во кое живееме од којшто страда современиот човек, оттуѓувањето, безчуствителноста, умртвувањето на човекот во човекот, онаа наша, тешко ни е да размениме збор, тешко ни е да размениме насмевка, а тоа вреди многу повеќе од се што е материјално околу нас. Ние како да сме исплашени од самите себе и оние сличните на нас и имам чувство дека играме постојано некаква брканица во којашто се надеваме дека нема да го сретнеме оној што е подобар од нас во нешто, оној што е поуспешен од нас во нешто заради тоа што тешко можеме да му признаеме, еве добар си во ова, добро го правиш, ти честитам и така натаму. Во меѓустиховите ќе го прочитате и тоа во поезијата на Ице Беличев, вели: И така молкум со изгубена насмевка играме живеење“, кажа проф. д-р. Ана Витанова Рингачева потенцирајќи дека Ице одбрал силно асоцијативен наслов на својата трета книжевна објава, наслов којшто коренсподира со неговите размислувања дека поезијата, музиката и сликарството, односно она што може да се пренесе со бои се трите најсветли страни на уметноста, меѓутоа и воопшто на животот.

„Кога овие три уметности влегуваат во симбиоза, тогаш делото што настанува го има предзнакот на уметност. Ако една од дефинициите за поезијата е дека таа претставува слика што говори, тогаш следствено на тоа поезијата во стихозбирката „Мелодија на платно“ носи во себе многу зборливи слики во боја оставени по ѕидовите на овој црно-бел свет, да му дадат боја и да го направат поубав“, кажа Витанова Рингачева.

Стихови од најновата сихозбирка на Ице Беличев читаа Сузана Мицева и Катерина Панов Кожаров во придружба со гитарата на Елена Ѓоргиева. Поезија читаа и градоначалникот Костадин Костадинов, и колеги-советници на Беличев, читаа и многу други од публиката.

Поетесата и новинар Сузана Мицева вели дека поезијата од „Мелодија на платно“ веќе патува и стекна нови значења вечерва, читајќи ја споделувајќи ја со вас.

Авторот Ице Беличев е задоволен, како што вели и презадоволен, не се полни само очите, полно е и срцето.

„Не знам дали сум голем човек, дали сум голем наставник, дали сум пријател или навистина сум поет. Пред се сакам да бидам човек и во вашите очи да ме гледате како човек“, кажа Беличев обраќајки и се на многубројната публика.

Книгата „Мелодија на платно“ е во издание на Издавачката куќа и Фондација „Македонија Презент“, а со поддршка на Министерството за култура.

ФОТОГАЛЕРИЈА