И годинава во Струмица се одржа италијанско-македонска вечер во знак на пријателството на овие две држави, а веќе трета година Здружението за промоција на италијанскиот јазик и култура „Кво Вадис Ад Астра“ од Струмица го реализира овој настан со поддршка на Амбасадата на Република Италија во Македонија и Општина Струмица, како дел од одбележувањето на Денот на италијанско-македонското пријателство.
Убава вечер на која во преполнетиот Амфитеатар во Струмица синоќа публиката уживаше во програмата подготвена од организаторите, а во која настапија хорот при СОУ „Димитар Влахов“ под диригентство на проф. Анита Станковска, изведбата на едночинката „Струмиченца-Пјаченца“ со средношколци на Драмската секција од СОУ „Димитар Влахов“ од Струмица, по сценарио на Ѓорги Калајџиев, а во режија на Танкица Стојанова, како и настап на познатиот италијански акапело бенд „Мезотоно“, кој беше шлагот на оваа, за многумина незаборавна вечер исполнета со уживање, хумор, пеење во која учествуваше и публиката со „Мана-Мана“, но и самиот случаен настап на сцената на Илија и Ана.
