Во Струмица денеска се одржа бизнис форум на кој присуствуваа премиерот Христијан Мицкоски, претставници на Владата, како и голем број струмички стопанственици од регионот. Настанот беше организиран со цел унапредување на дијалогот помеѓу државните институции и приватниот сектор, и отворање можности за подобра економска соработка и инвестициски развој.
Во своето обраќање, премиерот Мицкоски истакна дека Владата активно работи на креирање услови за стабилна и предвидлива бизнис клима, поттикнување на домашните и странските инвестиции и намалување на административните пречки со кои се соочуваат компаниите.
„Оваа Влада е партнер на стопанствениците, а не нивен противник. Веруваме дека економскиот раст не се гради од канцеларија, туку во фабриките, на нивите и на пазарот, токму таму каде што се создава реалната вредност. Затоа сакаме да ги слушнеме вашите предлози и проблеми, за да можеме заеднички да најдеме решенија“, им кажа Мицкоски на бизнисмените.
Бизнисмените од Струмица и регионот на форумот ги изнесоа своите ставови за актуелните економски предизвици, вклучително и потребата од стабилни енергетски цени, поефикасна даночна политика и поддршка за извозно ориентираните компании. Во своите обраќања нагласија дека само преку континуирана соработка со институциите може да се обезбеди одржлив локален развој.
На форумот се обрати и кандидатот за градоначалник на општина Струмица од ВМРО-ДПМНЕ, Петар Јанков, кој истакна дека бизнис секторот е клучен двигател на локалната економија и дека општината, во соработка со централната власт, ќе создаде услови за нови инвестиции и отворање на работни места.
„Нашата цел е да ја направиме Струмица град кој ќе го препознаваат по стабилна економија и поддршка на секој вреден човек што создава. Ќе отвориме врата за транспарентна комуникација со стопанството и ќе работиме на тоа ниту еден инвеститор да не биде препуштен сам на себе“, истакна Јанков.
Форумот помина во конструктивна атмосфера, со отворена размена на мислења, идеи и предлози. На крајот, беше заклучено дека ваквите средби ќе продолжат и во иднина, со цел да се обезбеди континуиран развој на бизнис секторот и подобрување на економската клима во Струмица и регионот.
