Премиерот Димитар Ковачевски во посета на Струмица

Премиерот Димитар Ковачевски во придружба на министерката за труд и социјална политика, Јована Тренчевска и заменик министерката за правда, Викторија Аврамовска Мадиќ денеска беа во постета на Струмица. Домаќин им беше градоначалникот Костадин Костадинов со кој во неговиот кабинет разговараа на повеќе теми поттикнати од актуелните состојби и новите предизвици и како се решаваат во Струмица. Владините гости го посетија и новоотворениот Младински центар во некогашните подрумски простории на општинската зграда.

Премерот Ковачевски ја посети Детската градинка „Виножито“, најголемата изградена установа за ран детски развој во државата, во рамки на Проектот за подобрување на социјалните услуги на Министерството за труд и социјални услуги и Светска банка.

„Најнапред благодарам на гостопримството да бидам дел од оваа градинка и од овој успешен проект. Овде се потврдува правилото дека работата дава резултати. Доказ е градинката „Виножито“, овде во Струмица, каде една година по изградбата и отворањето на овој современ објект, нè пречекаа насмеани деца, задоволни вработени и спокојни родители. И посебно е чувството кога тие резултати се насмеани деца, згрижени на топло и на безбедно, во нови и современи градинки, како што доликува на држава со перспективи, којашто успешно се развива по европскиот пат. Децата, тука во „Виножито“, се уверив и лично дека престојуваат во современи услови за предучилишно образование, игра, раст и развој, како што беше предвидено. Градинката има услови за греење на гас. Постојано се инвестира. И следен чекор е инвестиција во сензорна соба, за да се зголеми опфатот на деца со попреченост. Згрижени се и предвидените, над 300 деца во оваа навистина голема, современа и прекрасно опремена градинка“ – кажа Ковачевски при посетата на градинката.

Тој информираше дека инвестирано е и во други градинки во општината, односно во доградби на градинката „Детска радост“, при што, во еден од клоновите веќе е зголемен капацитетот за 57 деца, а во друг е зголемен опфатот за уште 68 деца. Направена е и адаптација на уште еден објект од оваа градинка, во село Куклиш, со средства од Општина Струмица, со што уште 58 деца добија можност за посетување предучилишно воспитание и образование. И, во село Муртино, со средства од Општина Струмица, е направена група, во други просторни услови, за згрижување 27 деца.

Премиерот Ковачески денеска го посети и Центарот за дневен престој „ЕДУ практика“ во Струмица. Децата кои го користат овој дневен центар имаат можност за разни активности, а овде се обезбедени и услуги за деца кои имаат потреба од индивидуален третман. Во моментот во државата има 35 државни дневни центри и 8 дневни центри како овој, во кои работат лиценцирани даватели на социјални услуги.

„Овој центар е уште еден сервис на граѓаните, а Владата тоа и го овозможува преку бројните реформи во системот за социјална и детска заштита кои ги спроведуваме од 2017 година наваму. Креираме  политики кои се системски и трајни и што е најважно создаваме услови за активно вклучување на лицата со попреченост во општеството, со што спречуваме каква било дискриминација, а од друга страна ги зајакнуваме сите форми на социјална солидарност. Со користењето на овие услуги во заедницата децата ќе може да ги надоградуваат своите функционални капацитети, а исто така  овозможуваме нивните родители или старатели да можат да работат, наместо да седат дома и да треба да ги чуваат да се грижат за децата“ – кажа Ковачевски.

Во Центарот за дневен престој „Еду практика“ Струмица, во моментов има вработено вкупно 12 лица, од кои 6 лица стручен кадар – дефектолози, психолози, социјален работник и логопед, 4 негувателки и 2 лица како помошен персонал.

Националното координативно тело во Владата, заедно со МТСП и германското друштво за меѓународна соработка и со исклучителна партиципација на лицата со попреченост и нивните организации направија нова Стратегија за лица со попреченост 2023-2030 година за чија реализација со Акциски План Владата одвои 46 милиони евра. Нејзината верзија во иднина ќе ја има пред себе секој функционер, а индикаторите за нејзината реализација ќе се следат преку мрежна  електронска алатка, каде лесно се гледа кој колку реализирал.

ФОТОГАЛЕРИЈА