![almak](https://strumicanet.com/wp-content/uploads/2024/12/srnet-banner-dec-2-optimized.jpg")
Денеска во Домот на АРМ во Струмица пред голем број заинтересирани граѓани беше презентиран новиот Генерален урбанистички план на град Струмица со плански период 2023-2033 година.
Од Општина Струмица велат дека по 21 година изготвен е Нацрт план за нов Генерален урбанистички план на град Струмица, важен урбанистички документ кој ќе создаде простор за планиран, урбан и квалитетен развој на градот.
„Поднесени се и над 200 анкетни листови од граѓаните, со што се потврдува дека целиот процес е транспарентен и отворен за дискусија и предлози“, информираат од општината.
Според градоначалникот Костадин Костадинов со новиот Генерален урбанистички план е предвидено дуплирање на зелените површини од постоечките 40 на 84 хектари, нови сообраќајници, нови парцели за образовни институиции и дислокација на последниот индустриски загадувач, рудникот „Огражден“ и голем ризик фактор за здравјето.
„На Струмица и прилегаат храбри одлуки. Не смееме да се плашиме од зеленило и од фактот дека воздухот ни е загаден и таква храбра одлука очекувам и од мнозинството во Советот на општина Струмица, да го усвои Генералниот урбанистички план и многу брзо да стапи на сила“ – кажа градоначалникот Костадинов.
Советничката група на ВМРО-ДПМНЕ не се согласува со предложениот Генерален урбанистички план. Според координаторот на советничката група, Никола Маџунков овој предложен ГУП не бил прифатлив за граѓаните, дека не е транспарентен, не е еколошки и не ги штити подеднакво интересите на сите граѓани.
„Граѓаните не го подржуваат предложениот ГУП. За прв пат во Струмица, огромен број на граѓани поднесоа анкетни листови со забелешки против ГУП. Ваков предложен ГУП не ги почитува законските регулативи за негово носење – преку ненавремено формирање на партиципативно тело кое е битно за инклузија на заедницата во креирање на ГУП. Затоа бараме да се повлече предложениот ГУП со сите забелешки, да се преработи за да може да ги заштити подеднакво интересите на целата заедница во Струмица“ – вели советникот Маџунков.
