Пред четири години на денешен ден почина маестро Зоран Џорлев

На денешен ден (1 јануари 2021 година) на Инфективната клиника во Скопје, по компликации од ковид-19, почина познатиот виолинист, маестро Зоран Џорлев.

Зоран Џорлев е роден на 10 јануари 1967 година во Струмица. Детството го поминал во Струмица, живеејќи на улицата „Пере Тошев” во близина на некогашното кино „Балкан“, заедно со братот Ристо и сестрата Софче. Син е на Наско Џорлев, познат композитор на народна музика и водач на оркестар.

Кога бил првооделенец Зоран со семејството се пресели во Скопје. Уште во раното детство, во Струмица, започнал да свири на труба, хармоника и гитара. Во 1977 година почнал да свири на виолина, откако претходно во музичкото училиште бил одреден да свири на пијано, зашто „немал предиспозиции за виолина“.

Во 1989 дипломирал виолина на Факултетот за музичка уметност. Познат е по обработките и изведувањето на македонските народни и забавни композиции, обработки на филмски, џез, етно теми. Работел како професор по виолина, а беше директор на ДМБУЦ „Илија Николовски Луј“ во Скопје. Во јануари 2011 беше назначен за директор на Ансамблот за народни игри и песни „Танец“, каде останал до август 2017 година.