Пред споменикот „Македонија“ одбележан 68-от роденден на загинатиот претседател Борис Трајковски

Струмица го одбележа 68-от роденден на трагично загинатиот претседател на Македонија, Борис Трајковски.

Споменикот „Македонија“ поставен во струмичкиот парк во чест на Трајковски беше местото кое го посетија голем број струмичани, положија свежо цвеќе и се потсетија за животот и делото на претседателот, но и нивниот роднина, пријател и сограѓанин.

Во чест на претседателот Борис Трајковски цвеќе положија и членови на семејството Трајковски, претставници на локалната самоуправа, политички партии и претставници на институции и здруженија.

За претседателот Борис Трајковски говореше градоначалникот на Струмица, Костадин Костадинов.

„Борис Трајковски го имаше во себе златниот универзален клуч кој ги отвора сите порти. Претседателот го знаеше добро познатиот и испробан рецепт кој вели дека проблемите треба да се постават врз постулатите на дијалог, доверба и толеранција. Тој рецепт знаеше и да го примени, притоа ставајќи се самиот себе и како влог, и како заложник, и како гаранција на страната на вистината, во спрега со вистинољубивоста и со безрезервната преданост на силната верба во човековата вредност, без разлика на неговата национална припадност, политичка ориентација или верска определба“ – кажа Костадинов.

ФОТОГАЛЕРИЈА