„Предложи! Вистинска идеја за вашата општина“ – ВМРО ДПМНЕ со акција за собирање идеи и предлози од струмичани

Општинскиот комитет на ВМРО-ДПМНЕ од Струмица од синоќа ја почна акцијата за прибирање идеи и предлози од граѓаните за подобар развој на општина Струмица, кои ќе бидат дел од предизборната програма на претстојните Локални избори.

Под мото „Предложи! Вистинска идеја за вашата општина“, синоќа пред споменикот на Благој Јанков Мучето на влезот во големиот градски парк беше поставен штанд, каде граѓани имаа можност да дадат свои идеи, предлози, но и да разговараат со пратениците Ели Панова и Жан Дрвошанов, како и со дел од општинското раководство на ВМРО-ДПМНЕ.

„Струмица има идеи, Струмица има визија! Со акцијата „ПРЕДЛОЖИ!“ им даваме глас на сите граѓани – твојата идеја може да биде дел од иднината на нашиот град. Почнавме денес пред споменикот на Благој Мучето, а утре продолжуваме со нови средби. Биди дел од промената, твојата мисла вреди“ – стои во пораката на пратеничката Ели Панова до своите сограѓани кои ги поканува да се приклучат во креирањето на концептот за подобро функционирање на општина Струмица.

Претседателот на ОК на ВМРО-ДПМНЕ Струмица, Жан Дрвошанов најави дека акцијата за собирање идеи продолжува и во наредните денови, на различни локации. Денеска штадот ќе биде поставен на пазарот „Чешел“ од 11:00 часот, во недела од 18:00 часот пред споменикот на Благој Јанков Мучето, во понеделник од 15:30 часот пред Комерцијална Банка, вторник од 15:30 кај поранешен „Тинекс“ на булеварот и во среда од 15:30 часот пред главниот влез на ТЦ „Глобал“.