Превентивни активности на СВР Струмица кон возачите – се вклучи и министерот Панче Тошковски

Во рамките на денешната посета на СВР Струмица и струмичкиот регион, министерот за внатрешни работи Панче Тошковски посети пункт во Босилово каде полициски службеници ја реализираа кампањата „Стави појас“ и „Никогаш не вози пијан!“, како дел од континуираните превентивни активности кои се преземаат во соработка со Републичкиот совет за безбедност на сообраќајот на патиштата. Во кампањата на полициските службеници им се приклучија и министерот Тошковски, кој заедно со градоначалникот на општина Босилово, Ристо Манчев на возачите им делеа флаери со едукативна содржина.

„Сообраќајно превентивни активности во општина Босилово со цел подигање на свеста за одговорно учество во сообраќајот. Превентивното дејствување е важна алатка за долгорочно подобрување на безбедноста во патниот сообраќај“ – кажа министерот Тошковски.

Тој ја посети и Полициската станица за гранични проверки и граничен надзор Ново Село.

„Покрај граничниот премин, Полициската станица Ново Село го покрива и граничниот надзор на делови од источната и јужната граница. За разлика од полициските станици кои се занимаваат со оваа проблематика на северната граница, во оваа станица има соодветни материјално-технички средства и возила, а во делот на постапувањето на полициските службеници треба да се потенцира соработката со Фронтекс и мешаните патроли во соработка со бугарската полиција“ – кажа министерот Тошковски.