![almak](https://strumicanet.com/wp-content/uploads/2024/11/srnet-banner-noe-2-optimized.png")
Општина Босилово организираше фестивал на рачни творби и традиционална храна направени од жители на општината – „БАЗАР ФЕСТ Босилово 2024“. Прво издание, но со желба да прерасне во традиција и да се одржува секоја година, каде жители од овој регион ќе ги понудат своите производи кои тие ги создаваат, а се во знакот на традиционалното македонско творештво.
На дваесеттина штандови во центарот на Босилово беа изложени прекрасни, креативни, но и уникатни производи од ткаенина, дрво, камења, како и вкусна храна по рецепти од нашите прабаби, кои сегашните жители сé уште знаат да ги подготват. Го имаше и домашниот ајвер, пинџурот и природниот мед.
Многу народ се собра, едните продаваа, други купуваа, а трети уживаа во музичката програма што организаторот ја подготви во соработка со естрадни уметници, а имаше и забава за најмалите жители, децата.
Целта на организирање на ваков настан е да се промовира претприемништвото, особено женското претприемништво и ранливите категории на граѓани.
„Многу од вас поседуваат разно разни вештини и способност да изработат ракотворби, меѓутоа немаат многу места каде тоа да се изложи, каде тоа да се промовира, а многу од вас при изработката и продажбата на овие прекрасни ракотворби, некако срамежливо настапуваат. Со ваквите манифестации сакаме да ве охрабриме, да ве повикаме, сетоа то што вие го знаете и умеете, тоа е многу вредно, потребно е само да го изложите, а граѓаните ќе знаат тоа да го ценат и да го вреднуваат“ – им кажа на изложувачите градоначалникот на општина Босилово, Ристо Манчев додавајќи дека со оваа манифестација сакаат и во руралните средини да има што повеќе општествени настани и случувања како би можеле понекогаш да се избегне од секојдневните обврски.
