Православните верници денеска го прославуваат Светиот великомаченик Димитриј

Православните верници денеска го прославуваат Светиот великомаченик Димитриј. Митровден бил домашен празник во домот на светите Кирил и Методиј.

Светиот великомаченик Димитриј Солунски живеел во третиот век и бил син на управителот на Солун. Легендата вели дека солунскиот војвода долго немал пород и по многуте молитви упатрени кон Бога бил даруван со машко дете кое со големо внимание го образувал, го воспитувал и го воведувал во христијанството.

По смртта на татко му, Димитрија бил именуван од страна на царот за градоначалник на Солун, при што бил советуван да биде немилосрден кон христијаните, да ги убива и прогонува секаде каде што ќе ги сретне. Но Димитрија најпрвин тајно, а потоа и јавно ги подучувал христијаните како да се чуваат од лошите пагани и да не се откажуваат од Христа, дури и по цена на животот.

Додека со Ѓурѓовден 6-ти мај се празнува времето кога човекот излегува во природа, на сонце што би се рекло… со Ѓурѓовден започнува летната половина од годината што трае до Митровден, период кога оживува природата, а на луѓето им претстои многу работа. Со Митровден се поврзува почеток на зимскиот циклус на годината.