Почнува форумскиот процес во општина Босилово – жителите ќе одлучуваат за што ќе се потроши грант од над 40.000 долари

Од денеска во општина Босилово почнува форумскиот процес на кој жителите на оваа општина ќе имаат можност да дават предлози, да дискутираат и да одлучат за што ќе се потроши грант од над 40.000 долари што Општина Босилово го доби како дел од проектот „Зајакнување на општинските совети – фаза 2“, финансиран од страна на Швајцарската Влада и Министерството за локална самоуправа, а ја кофинансира и спроведува Програмата за развој на Обединетите нации (УНДП) и Општина Босилово.

Првата форумска сесија, од вкупно четири, ќе се одржи денеска (петок, 22 ноември) во ресторан „Мона Лиза“ во селото Радово од 16:00 часот на кој граѓаните транспарентно и одговорно ќе одлучат која тема, односно програма е приоритетна, за да потоа предложат и можни проекти за реализација кои ќе го подобрат животот на граѓаните во општина Босилово.

Паралелно граѓаните директно ќе го следат и процесот на создавање проект, но и негова реализација во новата 2025 година од кој бенефит ќе имаат сите граѓани на општина Босилово.

Градоначалникот на општина Босилово, Ристо Манчев упати покана до жителите на општината да бидат дел од првата форумска сесија и директно да учествуваат во процесот на лоцирање проблем, креирање на решение и негово преточување во проект за реализација за кој се обезбедени средства од над 40.000 долари.