![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Во Струмица, центарот на културата во источниот дел на Македонија и еден од најголемите центри во земјата, во градот кој живее со традиционални културни манифестации, од синоќа, па во наредната недела ќе живее и со првиот фестивал на класичната музика во нашата држава „Strumica Classic International Festival 2025“, кој во оваа четврта негова година прераснува во традиција.
Со концерт на пијано дуото „Гелебешеви“, во Храмот на културата стартуваше 4-то издание на „Класика меѓународен фестивал Струмица 2025“, а поздравно обраќање имаше м-р Васил Атанасов, струмичанец, главен иницијатор и реализатор на овој фестивал, еден од најпознатите светски обоисти и долгогодишен член на Македонската филхармонија, на Скопскиот дувачки квинтет и на Камерниот оркестар Скопски солисти, кој во 2022-та година заедно со неколку професионални музичари од Филхармонија, Опера и колеги од Музичкото училиште „Боро Џони“ во Струмица го осмислија концептот на фестивалот.
„И оваа година, во еден од наjубавите месеци, повторно ќе уживаме во звуците на класичната музика, изведена од врвни уметници кои ни гостуваат на фестивалот. Со својата музичка магија, тие ќе го допрат ѕвезденото небо над Струмица, а нашата публика ќе има чест и задоволство да биде дел од тоа доживување. За ова издание, се потрудивме да поканиме извонредни уметници и камерни состави од различни земји и жанрови, со цел да jа збогатиме културната понуда и да jа привлечеме струмичката публика“ – вели Васил Атанасов.
Фестивалот ќе се одржува до 10 јуни, а според програмата во фестивалските денови ќе настапат и квартет од Бугарија, флејта, виола, виолончело и контрабас, под водство на професорката Петја Багоска, кои на 5 јуни (четврток), од 20:00 часот ќе имат свој концерт во Центарот за култура „Антон Панов“. На 7 јуни (сабота) од 20:00 часот, исто така во Центарот за култура ќе настапи камерното дуо од Чешка, Кристијан Бодаровски со певицата од Прашката опера, Павлина Сенич. На 8 јуни (недела) фестивалот се сели во Црквата „Св. Петнаесет“, каде свој настап ќе има женскиот хор „Св. Злата Мегленска“, под диригентство на Летка Димовска Полизова. Почетокот на концертот е закажан за во 20:00 часот. На последниот ден од годинашното издание на „Класика меѓународен фестивал Струмица“ ќе настапи Квартетот Саксафони од Македонија, под раководство на професорот Горан Кавраков, кои ќе интерпретираат музика од Бах до филмска музика и обработки. Концертот ќе се одржи во Центарот за култура „Антон Панов“ со почеток во 20:00 часот.
