Почнаа „средбите под јаворите“ – литературна манифестација во чест на големиот поет Видое Подгорец

Во Струмица и Колешино и годинава се одржуваат „Средби под јаворите – Видое Подгорец“, годинава по 23-ти пат. Денеска во Домот на АРМ во Струмица почна оваа литературна манифестација каде беа доделени признанијата Библиотекар на годината – „Павлина Цунева Маказлиева“.

Во категоријата јавни библиотеки, признанието за библиотекар на годината се додели на Фетија Куртагиќ од ЈУ Народна библиотека, Рожаје, Црна Гора, а во категоријата училишни библиотеки на м-р Љупка Стојменова, училишен библиотекар во ООУ „Никола Карев“ во Кочани, Македонија.

Се одржа и советување на тема: „Библиотеката темел на писменоста“ на која говореа, проф. д-р Мариета Петрова, проф. д-р Анита Штерјоска Митреска, проф. д-р Милена Ристова Михајловска, Маја Мицевска Ризова, Марина Плашевска и м-р Елена Станкоска.

Во рамките на Манифестацијата се оргнизираат поетски конкурси за деца, конкурси за наставници, се одржува научен симпозиум, литературни читања, креативни работилници и многу други настани. Утре е официјалното отворање на манифестацијата, во 12:00 часот во големата сала на Дом на АРМ со перформанс на тема: „90 години од раѓањето на Видое Подгорец“.

Во сабота настаните продолжуваат во Колешино, родното село на Подгорец, каде во училиштето ќе се доделат наградите на најуспешните ученици и наставници од литературните конкурси, по што ќе следува посета на куќата на Подгорец во Колешино и заедничко дружење.